भोगवटदार रुपांतरित करण्याच्या नजराणा रकमेत कपात
■ हंसराज अहीर यांच्या पुढाकाराने राज्यातील मागासवर्ग व अन्य प्रवर्गातील शेतकऱ्यांना होणार लाभ
चंद्रपूर : भोगवटा वर्ग २ च्या जमिनीचे भोगवटा वर्ग १ मध्ये रुपांतरित करण्यासाठीच्या प्रलंबित तसेच दाखल केलेल्या प्रकरणात उपविभागीय अधिकारी स्तरावरील प्रकरणांचा त्वरीत निपटारा करणे. तसेच शासनस्तरावरील निर्णय अपेक्षित असलेल्या प्रस्तावाचे अविलंब वर्गीकरण करून ही प्रकरणे शासन मान्यतेकरिता सादर करण्याच्या सुचना राष्ट्रीय मागासवर्ग आयोगाचे अध्यक्ष तथा माजी केंद्रीय गृह राज्यमंत्री हंसराज अहीर यांनी वेळोवेळी घेतलेल्या सुनावणीचा आढावा घेवून केली आहे.
भोगवटा वर्ग १ प्रकरणी माजी गृहराज्यमंत्री हंसराज अहीर यांनी गत वर्षभरापासून चंद्रपूर व यवतमाळ जिल्ह्यातील विविध उपविभागीय अधिकारी कार्यालयीन स्तरावर जनसुनावणी घेतली होती. त्यांनी या संबंधात मुख्यमंत्री देवेंद्र फडणवीस यांच्यास्तरावर पत्रव्यवहार व चर्चा करून ७५ टक्के आकारण्यात येणारी नजराणा रक्कम कमी करण्याकरिता सातत्याने प्रयत्न केले. यासंदर्भात राज्य शासनाने २० फेब्रुवारीला प्रारूप नियम प्रस्तावित करून ७५ टक्के असलेली नजराना रक्कम नगरपंचायत, नगरपरिषद हद्दीतील व बाहेरील, कृषक प्रयोजनार्थ धारण जमिनीला २५ टक्के आणि अकृषक जमिनीला ५० टक्के, रहिवासी प्रयोजनार्थ व कब्जी हक्काने वैयक्तिकरित्या धारण केलेल्या जमिनीसाठी १५ टक्के व भाडेपट्टयाने वैयक्तिकरित्या धारण
केलेल्या जमिनीसाठी २५ टक्के नजराना रक्कम केल्यामुळे प्रस्तावित मोठ्या संख्येतील भोगवटदार २ च्या बहुतांशी मागासवर्ग प्रवर्गातील शेतकऱ्यांना वर्ग १ करण्याकरिता मोठा लाभ मिळाला आहे. चंद्रपूर व यवतमाळ जिल्ह्यातील उपविभागीय अधिकारी स्तरावरील मागील काही वर्षापासून प्रलंबित प्रकरणांसह दाखल करण्यात आलेली अनेक प्रकरणे मार्गी लावण्यात आल्याने वर्ग १ मध्ये जमिनीचे रूपांतर होत असल्याने अनेक शेतकऱ्यांना त्यांच्या जमिनीचे मालकीहक्क मिळू लागल्याने शासनाच्या विविध सोयीसुविधांचा लाभही जिल्ह्यातील मागासवर्गीय तसेच अन्य प्रवर्गातील शेतकऱ्यांना मिळणार आहे.
0 टिप्पण्या